Dil Ki Barbaadi Ka Koi Silsilaa Pahle Se Tha …

Dil ki barbaadi ka koi silsilaa pahle se tha

Is chiraGh E shab pe altaaf E hawa pahle se tha

 

Us ke yuN tark E muhabbat ka sabab hoga koi

Ji nahi yeh maanta wo bewafaa pahle se tha

 

DonoN apni zindagi ke chhutpute meN haiN magar

Is tarah milna muQaddar me likha pahle se tha

 

Ab to zakhm E dil namak khaar E tawajjoh hai tera

Naam par jari tere harf E dua pahle se tha

 

Raasta bhoola nahi abke parinde khushkhabar

Aur kuchh ujRa hua shahr E sabaa pahle se tha

 

Tere aane se to bas zanjeer hi badli gayi

Hum asiiroN pe jafaa ka baab waa pahle se tha

Ab Kya Hai Jo Tere Paas AauN …

Ab kya hai jo tere paas aauN
Kis maan par tujhko aazmaauN

Zakhm ab ke to saamnehi khaaauN
Dushman se na dosti buRhaaauN

Titli ki tarah jo uR chuka hai
Wo lamha kahaN se khoj laaauN

Girvi haiN samaa’ateN bhi ab to
Kya teri sadaa ko muNh dikhaaauN

Ae mere liye na dukhne waale
Kaise tere dukh samet laaauN

YuN teri shanaakht mujh meN utre
Pahchaan tak apni bhool jaaauN

Tere hi bhalay ko chaahti huN
MaiN tujh ko kabhi na yaad aauN

Qaamat se baRi salib paa kar
Dukh ko kyuN kar gale lagaaauN

Deewar se bel baRh gyee hai
Phir kyuN na maiN bhi phail jaaauN

Amir E Shahr Se Sayil BaRa Hai …

Amir E shahr se sayil baRa hai
Bahut naadaar, lekin dil baRa hai

Lahoo jamne se pahle khuN-baha de
YahaaN insaaf se Qatil baRa hai

ChaTaanoN meN ghira hai, aur chup hai
Samumdar se kahiN saahil baRa hai

Kisi basti meN hogi such ki hurmat
Hamare shahr meN baatil baRa hai

Jo zil-lul-lah per eemaan laye
Wohi danaoN meN aaqil baRa hai

Use kho kar bahaaye-dard paayii
ZayaaN chhota tha aur haasil baRa hai

Sundar Komal SapnoN Ki Baaraat …

Sundar komal sapnoN ki baaraat guzar gayi jaanaaN
Dhup aNkhon tak aa pahuNchi hai raat guzar gayi jaanaaN

Bhor samay tak jis ne hamaiN baaham uljhaaye rakkha
Woh albeli resham jaisi baat guzar gayi jaanaaN

Sadaa ki dekhi raat hamaiN is baar mili to chupke se
Khaali hath pe rakh k kya saughat guzar gayi jaanaaN

Kis koNpal ki aas meN ab tak waise hi sar-sabz ho tum
Ab to dhup ka mausam hai barsaat guzar gayi jaanaaN

Log na jane kin raatoN ki muraadeN maaNga karte haiN
Apni raat to woh jo tere saath guzar gayi jaanaaN

Shab Wohi Lekin Sitara Aur Hai …

Shab wohi lekin sitara aur hai
Ab safar ka iste’ara aur hai

Ek muththi rait men kaise thame
Is samandar ka kinara aur hai

Mauj k murne men kitni der hai
Nao dali aur dhara aur hai

Jang ka hathyar tai kuch aur tha
Teer seene men utara aur hai

Matn men to jurm sabit hai magar
Haashiya, sare ka sara aur hai

Sath to mera zamiN deti mager
Aasman ka hi ishara aur hai

Dhoop men dewaar hi kaam ayegi
Tez barish ka sahara aur hai

Haarne men ek anaa ki baat thi
Jeet jane men khasara aur hai

Sukh ke mausam ungliyoN pe gin liye
Fasl E gham ka goshwara aur hai

Der se palkeN nahi  jhapkiN meri
Pesh E jaN abke nazara aur hai

Aur kuch pal us ka rasta dekh lun
Aasman par ek tara aur hai

Had chiraghon ki yahan se khatm hai
Aaj se rasta hamara aur hai

Apni Tanhayi Mere Nam Pe Abaad Kare …

Apni tanhaayii mere naam pe aabaad kare

Kaun hoga jo mujhe us ki tarah yaad kare

Dil ajab shahr K jis par bhi khula dar iska

Woh musaafir ise har samt se barbaad kare

Apne qaatil ki zahanat se preshan hun main

Roz ek maut naye tarz ki eejaad kare

Itnaa hairaaN ho meri be-talabi ke aage

Wa qafas mein koi dar khud mera saiyyad kare

Salb E beenaayii ke ahkaam mile hain jo kabhi

Raushni chhune ki khashish koi shabzaad kare

Soch rakhna bhi jaraayem mein hai shamil ab to

Wohi maasoom hai har baat pe jo saad kare

Jab lahoo bol paRe uske gawaahoN ke khilaf

Qaazii-E-shahr kuchh is baab mein irshaad kare

Uski muTThi mein bahut roz raha mera wajood

Mere saahir se kaho ab mujhe aazaad kare

(Parveen Shakir)

Bahut Roya Woh Hum Ko Yaad Kar Ke

Bahut roya woh hum ko yaad kar ke

Hamaari zindagii  barbaad kar ke

PalaT kar phir yahiN aajayeNge hum

Woh dekhe to hamaiN aazaad karke

Rihaayii ki koi soorat nahii hai

Magar haaN! minnat E saiyaad kar ke

Badan mera chhuaa tha usne lekin

Gaya hai rooh ko aabaad kar ke

Har aamir tool dena chaahta hai

Muqarrar zulm ki mee’aad kar ke

(Parveen Shakir)

Yun Hausla Dil Ne Haaraa Kab Tha

YuN hausla dil ne haaraa kab tha
Sartaan  mera sitaaraa kab tha

Laazim tha guzarna zindagi se
Bin zehr piye guzaaraa kab tha

Kuchh pal use aur dekh sakte
AshkoN ko magar gawaaraa kab tha

Hum khud bhi judaayi ka sabab the
Uska hi qusoor saaraa kab tha

Ab aur ke saath hai to kya dukh
Pahle bhi koi hamaaraa kab tha

Ek naam par zakhm khil uthe the
Qaatil ki taraf ishaaraa kab tha

Aaye ho to raushni hui hai!!
Is baam par koi taaraa kab tha

Dekha hua ghar tha par kisi ne
Dulhan ki tarah saNwaaraa kab tha

(From KHUD  KALAAMI by Parvin Shakir)

Kyun Mujh Pe Hua Hai Mehrbaan Tu

KyuN mujh pe hua hai mehrbaaN tu
Ek zarra-e-khaak aur kahaaN tu

MaiN dhoop ki aadi ho chali thi
KyuN mujh pe bana hai sayebaaN tu

MaiN teri zameen-e-nisf-e-shab huN
TaaroN bhara mera aasmaaN tu

Aise hi hamaari soch yekjaan
MaiN nutq tera, meri zabaaN tu

Taiyyar huN maiN safar ko lekin
Kashti ka uThaaye baadbaaN tu

Kitna bhi ho sakht mera lehjaa
Deeba-o-hareer-o-parniyaaN tu

Ek aam ghareeb-e-shahr hun maiN
Kya sun ke karega daastaaN tu

Pat_thar mein gulaab dekhta hai
Kis darja hai mujh se khushgumaaN tu

Ab thoRa sa waqt rah gaya hai
Zaaye’ karuN maiN na raayegaaN tu

(Parveen Shakir)

Gaye Baras Ki Eid Ka Din …

Gaye baras ki eid ka din kya achchha tha

ChaaNd ko dekh ke uskaa chehra dekha tha

Feza mein ‘Keats’ ke lehje ki nermahat thi

Mausam apne rang mein ‘Faiz’ ka misraa tha

Duaa ke be-aawaaz, uloohi lamhoN mein

Woh lamhaa bhi kitna dilkashh lamha tha

Hath uTha ker jab aNkhoN hi aNkhoN mein

Us ne mujh ko apne Rab se maaNgaa tha

Phir mere chehre ko haathoN mein le ker

Kitne pyar se mera maatha chooma tha!

Hawa! kuch aj ki shab ka tu ahwaal suna

Kya woh apni chhat per aaj akela tha?

Ya koi mere jeisi saath thi, aur uss ne

Chand ko dekh ke us ka chehra dekhaa tha?

(Parveen Shakir)